Password dimenticata?
	giovedì 17 maggio 2012		|	[Registrati]	RSS

NEWS

IL MURO

TG

VIDEO

JUVE STABIA

NAPOLI CALCIO

AFFISSIONI

DOCUMENTARI

VIDEO MESSAGGI

ANNUNCI

RUBRICHE

SPONSOR

'O sciummo Sarno

scenne alleramente

cu 'e culure d' 'o cielo

e addiruse e campagna.

Sta ienne a Ruvigliano

pe se spusà cu ll'onne

cchiù bella d' 'o mare.

Pa cerimonia nuziale

tutte 'e campe

se so vestute

e sciure profumate!

'E casarelle pittate e ianche

pareno tanta munacelle

pronte pe cantà.

'O scuogliere e Ruvigliano

che ffa 'o prevete

sta attiente 'e palumme

già sistemati pe vulà.

'E ddoie testimonie

Torre e Castellammare

mbicciuse e dispettose

nun fanno altro che parlà:

Ma scusate? A chi s'aspetta?

'O sposo già sta ccà

e 'a sposa addò sta?

ancora adda arrivà?

L'aucielle già sonano

'a marcia nuziale

e 'a sposa nun se vede

ancora pe sta cerimonia

accussì triunfale.

'O mare...è na tavola!

Fore 'a foce

ddoie file e varchetelle

una a Stabbia e n'ata a Torre

songhe chiene e bandierelle.

Sarno pe nu mumento

se ferma frasturnato

e 'o livello e ll'acqua saglie,

cresce paurosamente.

Se sente subbeto a voce

e n'arbere alluccà:

strunzo nun fa 'o fesso

e scinnetenne ambress pecchè

'o bagno m'aggie fatto

già stammatina.

'O povero zitiello

nun o puteva parià.

Ma comme nun è venute

allora m'è trarute...

e cu cchi...

dicitemmelle cu cchi?

Eppure ce vulevamo tantu bbene

0 sapite quanta lettere

l'aggie scritte ncoppe

'e foglie e platane...

ammore mio, pecchè

Pa' campagna appriparata

bbella comme nu ginegillo

tutto è silenzio

e nun canta cchiù nemmeno nu cardillo.

Sulo 'a voce d'o prevete

all'intrasatta se fa sentì:

don Sarnino, voi, come al solito

andate sempre di fretta

quante volte vi ho detto

di non sposarvi il giorno in cui

il padre della sposa non c'è...

mi sono spiegato, non c'è?!

Sarnetiello tutto scunfirate

ripiglia 'o cammino

e se ne scenne a mmare.

E mentre se sciacquea

se mette a pensà...

Aggiu capite

pe mo me lavo 'e piere

ma fino a c'arriva a cape

add'à venì suocreme...

E allora tutte quante inzieme:

'e case, l'evere, ll'arbere

'e testimonie

ll'aucielle

'e ffoglie

'e ripe

'o ponte

'a ferrovia

'o passaggio a livello

'o treno

'e varchetelle:

E' overoooo!

L'onna, 'a sposa cchiù bella, nun è venuta

pecchè 'o patre suie

mo nun ce stà.

Uhhh è propeto evero

manca 'o viento!

ENRICO DISCOLO